الحياة نيوز . في رسالة حطت على مكاتب “الحياة” حملت عنوان ” زينا – زي التوجيهي .. مع دوام عاشر_دولي” .. حيث فضّل مرسليها الكتابة باللغة العامية .. جاء فيها :
نحن طلاب O-level من مدارس مختلفه … حبين نوصل رسالتنا وصوتنا الى معالي وزير التربية والتعليم الدكتور تيسير النعيمي المحترم، ونحكي قليلا عن قرار الاستمرار بالتعليم عن بعد لطلاب الصف العاشر IG لأنه صار وقت إنه يسمعوا الناس القصة منيح.
للناس اللي ما عندهم فكرة ليش عاشر سنة كتير مهمة بالنسبة للطلاب اللي بيدرسوا IG… نقول سنة عاشر كتير مهم لأنو بييجي بعده امتحانات (O’levels) بتمثل 75 % من معدل كافة الطلبة ممن سوف يدخلون فيه الى الجامعات.
وللعلم السنة الماضية لغوا دوامنا، قلنا مش مشكلة بنعوض عالفصل الثاني إجا الفصل الثاني و لسا عنا أمل إنه كل شي رح يكون تمام، حكولنا دوامكم بـ 21/2 2021وعليه جهزنا حالنا، و حطينا جداول عشان ال mocks و ال pre-mocks (الأمتحانات التجريبية)، وبدينا ندرس، وبآخر لحظة قرروا يقعدونا بالبيت… زي كل مرة.
وهنا نقول كطلبة .. ضايل أقل من شهرين ل أول امتحان O-level إلنا، و مو عارفين كيف بدنا نلحق نخلص كل إشي قبل وقته حكينا كتير بالموضوع السنة الماضية، و بدنا نرجع نحكي و رح نضل نحكي لتنسمع اصواتنا.
اللي بيدرسوا IG بعيشوا توتر مو معقول هلأ و ما حد حاسس فيهم شو ذنبنا إذا مستقبلنا كله بيعتمد على علاماتنا بصف 10 و 11 و 12 مع العلم انه عاشر بيمثل 75 % من المعدل.
وعليه (كامبردج) رح تبعتلنا الامتحانات من بريطانيا بغض النظر عن دوام الطلاب في الأردن من عدمه اللي بيحكولنا “تعودوا عالوضع” و “مهو في كورونا” و “ما حدا قلكم تدرسوا IG”… أول شي إحنا النا فصلين كاملين متعودين وساكتين، بس لما يكون ضايل شهرين ل امتحاناتنا و لهلأ مو باديين (امتحاناتنا التجريبية) و لسا بدنا نعطل شهر قبل الامتحانات عشان ندرس، أكيد رح نتوتر و نحكي، شو متوقعين.
تاني اشي كورونا على عينا و راسنا بنعرف إنكم خايفين علينا بس التوجيهي مداوم، و هاي سنتهم الفاصلة، و عم بلتزموا عشان مستقبلهم، و احنا رح نلتزم لانو زي ما حكينا قبل، مستقبلنا بيعتمد على علاماتنا بهدول الـ 3 صفوف (12 ،11 ،10 ).
وهنا نقول اذا التوجيهي بيقدروا يلتزموا يعني إحنا كمان منقدر نلتزم احنا مش مختلفين، الفرق الوحيد إنو التوجيهي سنة و بتطلع نتيجتو.
احنا نتيجتنا مقسمة على 3 سنين.
نحن الطلبة عم نبذل كل الجهد اللي منقدر عليه بس محتاجين التعاون من وزير التربية والتعليم والوزارة عشان نضمن انه ما تروح علينا امتحانات الO’level و نكون جاهزين .
ولنحكي كطلبة للناس اللي لساتهم ما اقتنعوا، اعتبر حالك توجيهي و عندك امتحانات وزارية كمان شهرين ولسا ما داومت من بداية السنة ومش ملحقين عالمادة طبعا اضرب التوتر بـ 3 مرات لأنه احنا مش عارفين إذا رح نداوم ولا لأ، و ممكن بين الساعة و التانية تصدر قرارات جديدة.
كتير كطلبة نحن محتاجين بان نداوم هدول الشهرين، و ما رح يضر لأنه اعدادنا قليلة وإذا إنت حدا متفتح و بدك تكون مع الطرف الصح بهذا الموضوع رح تقتنع باللي عم نحكيه نحن اصحاب المشكلة كطلبة، شكرا كتير للي أعطانا من وقته عشان يقرأ.
نتمنى ان يوصل الشكوى الى وزارة التربية و التعليم الدكتور تيسير النعيمي مع كل التحية والشك.
الى وزارة التربية والتعليم – الأردن .
