محلياتهام

رسايل ماسنجر مع هرقل!

الحياة نيوز – فيصل محمد عوكل –  *مرحبا جناب الإمبراطور هرقل طمني عنك كيف صحتك
-عفوا مين اللي جاي يتخوث على وجاي بعد اربع آلاف سنه يطمن على صحتي بعد ماصارت عظامي مكاحل بنصحك تروح تنقلع من وجهي خليني نايم بدون ازعاج انقلع
*بليز جنابك انا صحفي بجريده الخازوق العالميه وحابب اطرح عليك اكم سؤال محيرات العالم
– ولك انا بقلك انقلع من خلقتي احسنلك جاي بعد اكم الف سنه تسألني اسأله بايخه وطرمه ولك انا لو بعدني صاحي بقدمك للاسود توكلك وبقعد اتفرج عليها وهي تقرقط عظامك مثل الفستق انقلع من وجهي خلينا نايمين
*بليز جناب الإمبراطور انا محسوبك صحفي وحابب ادردش معاك واسمع عن جنابك وعن حياتك وعن بطولاتك وعن مصاربك كمان
– شو شو شو مصاري ليش باقي مديون لحضرتك ولك انا مش شو بدي احكي معاك انا الإمبراطور فيلادلفيوس ابن الإمبراطور الأكبر جاي تسألني عن المصاري ليش ماخذ منكم قرض ولا سمعتو عني اني متعثر ولا اعطيتني دعم خبز وقطعتوه بتعرف انا لو بعدني طيب باجي اوكلك باسناني ماحد خالص منكم الطيبين ولا الميتين واحد ميت من آلاف السنين لاحقينو على قبرو روح انقلع من وجهي بلاش اعصب هسه والشغله مش لصالحكم
*جناب الإمبراطور بليززززز انت تؤمنو بالديموقراطية.
– اكيد اكيد احنا اللي عملناها ليش هالسؤال البايخ.
*بليز جناب الإمبراطور وانا مصر اعمل معك لقاء للعالم خليهم بتعرفوا عليك وكلها اكم سؤال وخلص ويادار مادخلك شر
– ولك انا مجنن الحضارات والإمم وجاي اخر الزمن تجنني شو بدك من الاخر خلصني بدي ارجع انام احكي بلاش تلفق لي حكي وتقول للعالم اني متكبر او حطيت عقلي بعقلك خلص شو اول سؤال خلصني انا عصبي وايدي فرطه اذا زعلت.
*جناب الإمبراطور الناس هون بتحكي انك باقي معاك مصاري وبتخبيهن بالمغر وبالمجاري والحمامات والكل عامل حاله انه وريث شرعي لمصاريك وذهباتك اللي مخبيهن وليل نهار نازلين صور بالانتر نت جننونا بمصاريك وذهباتك.
– وله انا من وين طالعلي حضرتك وبعدين ايش هذا الانتر نت وشو هذا الذهب اللي بتحكي عنه ليش ولك انا خويثه باقي ارمي مصاري بالشارع.
ولك انا بنيت قصور ودرجات وعمارات عظيمه علشان المواطنين يعيشوا مرفهين وحمامات على البخار بكل سيل ودرجات ونشرت الثقافه والمسرح والادب وكله هذا بمصاري مش ببلاش وبعدين انا كنت احارب في أطراف أوروبا حتى الحضاره الساسانيه ولو طالع عمري كان وريتك كيف اعلقك من مناخيرك علشان تتعلم تحكي مع إمبراطور مثلي وكمان جاي تتبلي على وتحكي انه فيه اللي ورثه منكم بدهم ذهباتي ولكم اعملو مثلنا قلدونا شو مالكم لاحقينا على قبورنا تزعجونا وتقولوا انكم قرايبي روحو غاد ولك انا كنت مديون من كثر الحروب وبوخذ بدل حمايه من الساسانين يعني بلطجه ادفع او بخلص عليك واووعكم واحد منكم يتخنفس وبحكي انه من قرايبي والا بخليه يسدد الديون اللي متت وما دفعتها لكبار القوم من مجلس الشيوخ والاثرباء أثناء الحروب أخذوا السيف والحصان والترس وباعوهن حتى يسددو الدين اللي علي وبعدين انت من اي حضاره بتحكي معاي وبأي عصر اشوف مين هذول اللي بيحكوا انهم لقوا ذهباتي ليش باقي اهبل ولا خويثه احطهم بجره ولا بمغاره شو انهبلتو احنا حضاره كبيره عريقه لنا نظم اقتصاديه ماليه عمركم مارايحبن تعرفوها هذا انتوا المجانين بتخبو مصاريكم تحت البلاطة لأنكم بخلا وبتخبوها بالمخدات والفرشات لأنكم مهروشبن بمخكم لا خليتو ميت يتهنو بموتته ولاتاركين قبر بحاله ولا حد فالت منكم شو خكايتكم مع الذهب والمصاري ول لهدرجه وصل فيكم جنون الطفر والهذربه
*بليز بليززززز جناب الإمبراطور هسه اتاكدت انك من قرايبنا من كلمه هذربة.
– لا باروح امك يافالح عامل حالك بتفهم وجايب الذيب من ذيله ولك انا جنبي واحد ميت من جماعتكم قاعد ببترجم اللي حكيك بعدين بدي اسالك يااعلامي الغبرا انت من وين جبت عنواني هذا ومن دلك على رابطي لاقطعه تقطيع واطعميه للاسود وهسه لازم اجيك ولو على شكل كابوس أعجب عليك واشوف ايش بيصير وليش الكل مشتغل بأهلي وكله بيقول هرقل هرقل انا بوريك. .. الو الو الو ولك جاوب يا اعلامي الغبرا ابو الفيس بوك وين هربت ياخوبف ولا يهمك ولك انا هرقل صدقني لاطلعلك من كاسه الشاي ولا بهمك بوريكم يادوارين الذهب ياطفرانيين ياكحيانين خليتني اصحصح واشوف شو قاعدين بتعملوا .. طن طن طن الهاتف مغلق والانتر نت مقطوع وعامل حالي انا مش هون بلاش يعملها ويطلعلنا بجننا ويكركبنا.

تابعنا على نبض

مقالات ذات صلة

زر الذهاب إلى الأعلى

الرجاء ايقاف مانع الاعلانات لتصفح الموقع

برجاء دعمنا عن طريق تعطيل إضافة Adblock