محليات

فهمونا إياها أُحجية فاتورة الكه … رباء ياحكومة

الحياة نيوز – فيصل محمد عوكل –
يوميات مدام جزعة هانم … يسعد صباحكم ياجماعة الخير فاتورة الكهرباء هاي شقلبت مخي شقلبة وبطلت اجمع هل ادفع ام اخلع الساعة والاسلاك وارجع الم حطب واولع جلة وشمع وقنديل زيت . شغلة بتجنن على الصبح اتصبحت بفاتوره الكهرباء طلع الاستهلاك 28 دينار قلت خيراللهم خير صحتين على قلبهم انزلت لتحت والا مكتوب 6 ليرات وثلاثمائة واربعة وثمانين قرش فراطة فرق اسعار وقود. طيب انا شو دخلني بالموضوع افهمها مش قادر افهمها وبديش افهمها كمان انا بعرف انه الكهرباء سلعة تنتجها شركة الكهرباء وتبيعنا اياها كسلعة وبالكيلو وسعرها معروف النا والشركة حاسبة التكاليف من الالف للياء وقديش بتربح بكل كيلو.
طيب انا شوعلاقتي ادفع حق الديزل ما دمت انا دافع حق استهلاكي الشخصي وشو علاقتي انا ادفع زيادة للشركة واشتريلهم النفط عشان ينتجو الكهرباء على حسابي ويبيعوني اياه كمان . شغلة بتخربط المخ ليش هيك بيصير وهل زعل شركة الكهرباء وارضائها مهم واحنا المواطنين ان ازعلنا نروح ننسطح يعني هاي مش راكبة مخي ابدا وبدي حد يشرحلي بالفلاحي بالمشرمح .. ياحفيظين السلامة طيب فلس الريف انا بعرف انه فلس واسمه فلس الريف صاربـ 49 قرش افهمها كيف الفلس صار 49 قرش طيب لانه للريف مسامحتكم فيه.
طيب الساعة او العداد كل شهرعشرين قرش كل شهر فهموني اياها يا عالم ياناس مهو انا دافع حقه قبل ما يركبوه عندي وبدال ما يعطوني مصاري اني انا بدير بالي عليه يدفعوني عليه عشرين قرش . تخنت براسي مش قادر اجمّع . المهم نطت الفاتوره من 28 دينار بقدرة قادر وصارت 39 وشوية فراطةه ياعالم اذا الحكومة طفرانة مهو انا معيش انا طفران وربكم عالم كيف بنمشي حالنا وعيشتنا دفش.
وهسه مقبعة معاي وحابب اسمع من حدا يشرح لي شرح قرايا مش شرح سرايا واحنا فلاحين وحراثين ورعيان ومدنيين بقصور او فلل او بيوت شعر . بدنا حد يفهمنا احنا ليش ندفع حق الديزل او الكاز تبع الشركة وهي محصلة منا كل فلس من حقها وبندفع ما بنتخنفس فهل هناك من يوضح لنا كيف هيك بيصير وليش ادفع ايجار عداد انا دافعه للشركة وحقه من جيبتي . الناس صابها خلل فني واتفرمت مخها من هالشغلة . مثلا انا رايحة اشتري علبة فيها كيلو فول وحكالي الدكنجي يا اختي حقها نص ليرة العلبة.
ولما جيت اوخذها حكالي لحظة ادفعي ايجار الطباخ اللي سلق الفول واجار الشوفير اللي جابها من بلدها لعندك هههه شغلة بتقهر . المهم هاي ذكرتني بقصة الجمل والهر هذا فيه واحد عنده جمل قرر يبيعه بدينارين انجنت مرته مزعت اواعيها وصارت اتلاطش من الزعل وتقوله انجنيت شو صار بعقلك جمل بدينارين . الزلمة اتراجع عن الفكرة لكن صار حالف يمين وسالها شو اساوي عشان تزبط معاي واربح.
قالتله .. اسمع ومسكت بسة او قطة او هرة عندها وربطتها بذيل الجمل وحكت لجوزها روح واحكي الجمل بدينارين والهر بمئتين والبيع على الاثنين وهيك بيتخربطوا ما بيقدروا يفرطوا بالجمل وما بيقدروا يخلصوا من البسة . وبيدفعوا واحنا بنرتاح وشعارهم الدفع او القطع .. ياحكومة بدنا حدى يفهمنا مش ناقصنا كركبة احنا مكركبين خلقه.

تابعنا على نبض

مقالات ذات صلة

زر الذهاب إلى الأعلى