الدكتور محمد أبوعمارة : –
دخل المنزل وهو يحمل الكثير والكثير من الأكياس والحاجيات، هرعت زوجته الحنونة نحوه “مين أبوالعبد !! إنت إجيت؟!” فأجاب كما العادة “لا والله لسه، بعدني بالشغل!!”
– شو جبت الأشياء اللي طلبتها منك؟!!
– آه، كل إشي..
– هات لأشوف
– جبتلك رز، وسكر، ولبن و حليب وخيار وبندورة وسبانخ وبصل وبقدونس ونعنع وأشوف… آه وبرتقال وإنجاص وتفاح وبوملي… وكمان باذنجان وفاصوليا وأغراض الكيك وعصير للأولاد، وسنيورة ولبنة وجبنة بيضاء وصفراء وبيض… وخبز عادي وخبز حمام… واشتريت كمان كل مواد التنظيف اللي طلبتيها…
– بس، هاد اللي الله قدرك عليه!!! حسبي الله عليك بس وعلى بخلك!!
– بُخلي!! يابنت الحلال كل اللي طلبتيه جبتلك إياه!!
– بعمرك ما فشيت قلبي يا رجل نفسي أطلب إشي وتجيبه، بس لازم تنكد علي!! وتسم بدي !!
– طب شو أنتِ طلبتِ وأنا ما جبته؟!
– ناسي!!! إعمل حالك ناسي ويلا مشيها مثل العادة!!
– طب شو نسيت؟؟
– من فترة الخطبة تتذكر لما حكيتلك جيبلي الشنتة الحمراء وما جبتها!!
– ولك ما حكتلك إنها كانت خالصة وما في لون أحمر وجبتلك بعدها (16) شنتة حمراء!!
– (16) شنتة حمراء كذاب والله (14) بس و(2) سود!!
– ومتذكر لما طلعنا بالخطبة عند أختك وما مسكت إيدي مع إني طلبت منك وترجيتك؟!
– يا حبيبتي مية مرة عدنا الموضوع وحكيتلك بأنه والله إني ما إنتبهت وما كان قصدي إشي، وخفت أمسك إيدك أحرجك!!
– يعني إنت الحمل البريء ما شاء الله عنك وما بتنساني ودايماً في بالك يختي عليك، متذكر بعرس إبن أم أحمد لما ضليتك صافن بالعروس ولا ناسي؟!!!
– نظرات أخوية حكيتلك، كنت مشبه عليها على بنت صاحب إلي…
– كذاب والله كذاب، ويوم العزومة اللي عند دار أهلك كل إخوانك حطموا نسوانهم إلا إنت كلهم كانوا يسكبولهم الأكل ويدللوهم إلا حضرتك…
– يا بنت الحلال ما إنت كنتِ قاعدة بعيده عني، قاعدة مع بناتك وأنا بعيد كيف بدي أطعميكِ!!
– والله ما بصدقك، أنت كنت بدك تبين إلهم إنك زلمة وشديد، وحاكمني من أولها…
– يعني ليش أنا مش زلمة!!
– والله إنت أدرى يا سيدي!!
– أنتِ قلبك أسود، كل مرة بتعيدي هادا الموشح!! ما بتزهقي ولا يتملي ولا بتكلي، شو إنت يا بنت الحلال،بالله عليك شو اللي زعلك اليوم، يعني شو أنا نسيت لحتى قلبت عليكِ المواجع، ورجعتيلي كل الذكريات السيئة!!!
– يا زلمة نفسي أوصيك على إشي وتجيبه!!
– يا بنت الحلال طب شو اللي طلبتيه مني وما جبته بس للمعلومة حابب أعرف؟!
– يعني عامل حالك مش عارف؟!!!
– والله ما أنا عارف !!
– أكم مرة حكتلك تجيبلي برتقال شموطي مش أبو صرة وكل مرة بتتعمد تجيب أبو صرة يعني شو قصدك؟!!
– والله إني ما بميزهم عن بعض!!
– والله؟!! كلامك مو صحيح!! أنت بتحب تنكد علي وتطلعلي روحي… نفسي، نفسي أمنية حياتي تجيبلي اللي بوصيك عليه!!
