يوميات مدير مدرسة حلقة (9)

بقلم الدكتور محمد أبوعمارة
مدير عام مدارس الرأي

السكرتيرة :دكتور
أنا : نعم
السكرتيرة :هنالك ولي أمر كبير بالسن يرغب بمقابلتك
أنا : دعيه يدخل
ويدخل رجل يبدو على ملامحه أنه تجاوز السبعين من عمره
– مرحبا دكتور محمد أنا اسمي الدكتور زكي…
أنا : أهلا دكتور زكي، عفواً أنت طبيب ولا دكتور علم؟
الدكتور زكي : أنا طبيب، اتخرجت من برطانيا سنة 1964
أنا : ما شاء الله سنة الـ…
الدكتور زكي : ما تضلك تقاطعني يا دكتور محمد!!
أنا : آسف … أسف… ما قصدت أن أقاطعك!
الدكتور زكي : وكنت الأول على الدفعة والعربي الوحيد بتخصصي، وكان الدكتور اللي اشرف علي يتحدى كل الأجانب فيي ويقول أنه أنا أفضل طالب درسه بحياته.
أنا : ما شاء الله عنك، بس أنت…
الدكتور زكي : حكيتلك ما تقاطعني!! وبعدها اشتغلت ببريطانيا بعيادة صغيره مساعد طبيب وخلال أيام قليلة صاروا كل المرضى يطلبوني بالإسم وصار الدكتور صاحب العيادة يغار مني.
أنا : طيب يا دكتور لو سمحت ندخل بالموضوع اللي حضرتك جاي عشانه..
الدكتور زكي : يعني مصر أنك تقاطعني وما أكمل كلامي!!
أنا : لا والله بالعكس أنا مستمتع بس كنت حاب أسئألك شو حابب تشرب؟!
الدكتور زكي : مي فاترة بس، مش شاي أو قهوة لأنه الشاي يحتوي على الكافيين من 2 إلى 4% وبأدي يا حبيبي إلى اضطراب النوم والتقيؤ والإسهال وعدم انتظام دقات القلب وشو أحكيلك لأحكيلك…
أنا : ليش هو أنت بدك تشرب كم لتر يا دكتور كاسة الشاي ما راح تعمل كل هالمصايب!!
الدكتور زكي : مشكلتكم أنكم شعب ما بده يتعلم، لا سيدي بتضر وأكثر كمان وأحكيلك عن القهوة..
أنا : لا يا دكتور شكراً ما تحكيلي
الدكتور زكي : لا لازم أحكيلك حتى أوعّيك لأنه العلم أمانه وأنا لازم…
أنا : يا دكتور لوسمحت أدخل بالموضوع اللي انت جاي علشانه!!
الدكتور زكي : لا والله غير أحكيلك عن القهوة أهم شي أنها بترفع الكولسترول وخاصة الضار وزي ما أنت عارف كل هاد بيأثر على القلب والشرايين وأحكيلك سر…
أنا : لا أرجوك…
الدكتور زكي : لا والله غير أحكيلك، الشباب اللي عمرهم أقل من سنة ممكن شرب القهوة بكميات كبيرة يؤدي لوفاتهم فجأة بس أنت – مختم- يا دكتور يعني فوق الـ(55) سنة شكلك ههههه
أنا : أنا، حرام عليك يا رجل…
الدكتور زكي : بمزح معك شو ما بتتحمل مزح، والقهوة كمان بتؤدي للسكتة الدماغية وارتفاع ضغط الدم وهشاشة العظام و … أكمل..
أنا : لا أرجوك ما تكمل، خلص بسحب كلامي… يا ولاء بسرعة كاسة مي فاترة للدكتور..
ولاء : مي بدون ولا اشي دكتور؟!!
أنا : نعم يا ولاء مي بدون ولا اشي!! تفضل دكتور أؤمرني شو بدك
الدكتور زكي : قبل ما أحكيلك شو بدي ممكن أسألك سؤال؟!
أنا : تفضل دكتور
الدكتور زكي : أنت ليش لابس أسود؟!!
أنا : بدون سبب بس لأني بحس أنه اللون الأسود جميل ولائق علي، وبالشغل بحكولي الأسود يليق بك ههههه
الدكتور زكي : بصراحة توقعت تجاوب هيك، لأن واضح انكم سطحيين
أنا : طيب يا دكتور منك نستفيد، تفضل احكيلي عن اللون الأسود!!
الدكتور زكي : لا والله ماني حاكي، الك ساعة بتقطعني بالحكي وبتتفلسف علي وعامل حالك أبو العريّف وأنت ما بتعرف دلالات اللون الأسود عزّا… فعلاً أمه لا تقرأ وعامل حالك مدير مدرسة ومثقف
أنا : أنا فعلاً مدير مدرسة!!
الدكتور زكي : فعلاً، أنك مستفز مأنا عارف يا أبو العريّف!
أنا : طيب دكتور زكي، ممكن سؤال؟
الدكتور زكي : لا مش ممكن!!
أنا : مين أبو العريف؟!
الدكتور زكي : فعلاً أنك جاهل، أبو العريف هو اللي مثلك عامل حاله بفهم بكل إشي وهو ما بفهم ولا بإشي وأصل القصة يعود لـ… ولا أحكيلك والله ماني حاكيلك…
أنا : أرجوك دكتور زكي، كمل قصتك!!
الدكتور زكي : لا والله ماني حاكي… فعلاً نك استفزيتني… بخاطرك….
ويغادر الدكتور زكي مكتبي دون أن أعرف ماذا أراد ولا من هو أبوالعريف!!
ركضت خلفه بالممر وأنا أصرخ: دكتور … دكتور زكي… دكتور بالله عليك مين أبوالعريف
توقف الدكتور زكي وأخذ نفساً عميقاً والتفت نحوي وغمز بعينه اليسرى وقال: والله ما أنا حاكيلك….