الرئيسية / محليات / لا تقربوا خبز الحمام حتى لاتطيروا معه عقول الناس

لا تقربوا خبز الحمام حتى لاتطيروا معه عقول الناس

* اللهم جنب حكومة الرزاز ان تسبب لنا هزة بدن او ارتجاج
الحياة – فيصل محمد عوكل – يوميات مدام جزعة هانم – صباح الناس الرايقة والعيون اللي من النوم قبل الصبح من قردنة الاولاد وابوهم فايقة ويسعد صباحكم واليوم صبحت جارتنا هازة بدني هزة بقوة سبعة رختر ونص كمان وصارت جارتنا اتنط قدامي مثل حبه البوشار بالطنجرة ونازلة بتلاخم وانا بحاول افهم منها الموضوع ولكن انفعالاتها المجنونه وغضبها جعلني اتركها وانا ببتسم بوجهها وانا متقلعطة من هيك صباح ييجيك جارك او حدى يهد حيلك ويسمم بدنك وانت مش عارف شو الموضوع.
المهم تركتها ورحت على المطبخ جبتها فنجان قهوه محروق حرق من كثر ما سخنته ولم اشربه واعطيتها الفنجان وقلتلها دخيلك اشربي قهوتك ومزمزي عليها وفهميني شو الموضوع خلعتي قلبي على هالصبح روقي وخلينا نفهم فاخذت اول رشقه من القهوة وقالت انت معقول ما بتعرفي معقول ما وصلك خبر من هون ولا من هون انه الحكومه الجديده يختي رفعت خبز الحمام سعره بعدين بطلت وياخوفي يكون هذا فتاش من الحكومه عشان تعرف كيف بدنا انساوى احنا طاش عقلنا من رفع الخبز.
واستبشرنا بالحكومة الجديدة وصرنا نتغزل فيها ليل نهار وانت عارفة يامدام جزعه هانم انه خبز الحمام هذا اهم من خبزتنا احنا الكبار ولو جعنا لانه هذا بنضحك على اولادنا وبنعمللهم خبزه الحمام سندويشه حسب ما قسم مرات بنلاقيش تعريفه بالدار بنحط فيه زعتر وبندهنة بلحسة زيت والولد بيطلع فرحان ياحسره قلبي ومرات بنحطله فيها شقفه جبنة مربعات او مثلثات وبنسحفها هاي سندويشة وبيطلع مزقطط فرحان معاه سندويشته يوكلها بالفرصة المدرسية بيكون متختخ من الجوع ومش ناقصنا الزغار يمرضوا من الجوع وفوق كل قله الحيلة تيجي الحكومة بدها تتعربش على سندويشة الزغار والله هيك هزلت وما بيصير وصدقيني انا جيتك فارعة دارعة ما انا شايفه الظو من ساعة ماعرفت انهم نفسهم يهبشونا برغيف الحمام والكعك اللي خبرك فيه اللي بنلهي الزغار ان جاعوا وبنحط عليه شاي يوكلوه هي وصلت لهون هاي الشغلة بتقبليها.
وهنا شعرت ان جارتنا نفست عن نفسها تماما وفشت غلها في انا وكاني انا الحكومة وانا مالي علاقة بالحكومه ولا بغيرها ولا اللي بالعير ولا بالنفير الا انني ضحكت في وجهها وقلت لها يابنت الحلال هذا الحكي من وين جبتيه اجابت الناس الدنيا كلها بتحكي وياما وراها هاي الخبزه ظايل يلحقونا على طبخه الخبيزة فعدت للحديث لجارتنا قائله اسمعيني هذا حكي اشاعات اشاعات وما بيصير كل سمعنا كلمه نصدقها ونحكيها ونهستر وننجن ونطلع نركظ بالشوارع مثل المجاني وخلينا نفهم وهاي حكومه مختلفه جدا شفتي رئيس الوزراء بعيونك لما اجا عندكم على الحي ومعاه المسؤليين عشان يخلصكم من مستنقع وبركه الببسي وشفتوه بعيونكم ومكناش احنا انشوف رئيس الوزراء الا بالتلفزيون بس.
وبعدين ياجارتنا ما شفتيه وهو بيحكي للناس اللي حواليه خلوا هالبنت تحكي ونسمعها وهي جايه تحكيله عن اولادها ومعهمش جنسيه امهم وكيق سمعها للاخر قالت جارتنا صدقت نعم هذا شقته عشان هيك انا جيتك اشكيلك اروح اتمجنن عند مين على هالصبح فاكملت حديثى قائلا لها طيب ما شفتيه لما قال هاتولي تلفون هالختيار انشوفه ونشوف حكايته ونساعده . طيب هاي الشغلات كلها شفتيها من حكومتنا الجديدة وما اظن حكومة الدكتور عمر الرزاز تعملها ابدا ولا رايح يقبلها لانه عارف انه الناس مقبعة معاها وفارطة مسبحتهم من الطفر وما اظن انه يسمح ابدا انه حدى يقرب على سندويشة المواطن او فلافلته او صحن فوله او حمصه او علبة سردينه فلا تخافي ولا يهمك هاي تخابيص حكي ما الها من الواقع شيء بس انا بعتب ليش ما يطلع حدى عن الحكومة ينفي حدوث هذه الاشياء حفاظا على مشاعر البني ادمين فالسندويشة للاطفال هي اخر ما نملك.
واغلى مانملك لانهم ان جاعوا اطعمناهم قلوبنا خوفا عليهم فلا تعتقدي ان الحكومه بتعملها ولا رايحه تقرب بالكعكات ولا يهمك هذا حكي غير رسمي ابدا وهو اخبار مش ولا بد لاتحطيها براسك هزت جارتنا راسها ونظرت الي نظره عميقه وقالت طيب الله يخليلك اولادك واولاد اولادك وينجحوا بالابتدائي والتوجيهي وانا رايحه ادعيلهم ينجحوا بس اكتبيلنا عن الرغيف هذا لانه خلع قلبي ورايح يخلينا احنا النسوان نوقع بالحيص والبيص كل يوم لما يروحو الاولاد للمدرسة.
قلت لها حاضر وعلى راسي وحياتك لاكتب وانت ادعيلي وادعي للحكومة الله يوخذ بيدها وتحط عقلها بعقل الفساد تخلعه من شروشه وتنسى خبزتنا الله يهديهم ويطلع النفط يارب ونصير نوكل خبز افرنجي وجبنة افرنجي ونتبحبح يارب وسكتت وقالت اسمعي ياجارتنا جزعة هانم انا ست مش مثقفه كثير شو رايك انت تدعي للحكومة وانا بحكي وراكي امين بلكي خلونا بحالنا قلت حاضر فقلت فصاحت جارتنا قائلة اللهم امين الله يشرح صدرك شرحتى صدري ياست النسوان يانوارة يخليك النا ويبعد عنا وعنك شر الاشرار ورفع الاسعار.

خبر عاجل